Title

Elmar ta aplica tecnologia nobo pa mehora servicio na cliente

Meter Read Registration Custom Code

Clientenan di N.V. ELMAR lo cuminsa nota e resultadonan di su sistema nobo di servicio na cliente, “Customer Information System” (C.I.S) cu ta diseña pa brinda miho servicio na e clientenan y provee un base mas eficiente pa cu tecnologia di informacion pa su operacionnan comercial.

Den su afan pa mehora servicio y eficiencia na cliente, N.V. ELMAR ta cabando cu e implementacion di e software nobo pa cu servicio na cliente, y e hardware pa apoy’e, pa yuda yega na un nivel di servicio di calidad cada dia mas halto pa medio di un solo solucion pa maneha tur proceso cu ta envolve e cliente.

A implementa e sistema automatisa di cobransa 25 aña pasa. Aunke a introduci diferente mehoracion den transcurso di añanan, e fundeshi y structura di e sistema no a wordo cambia y e tecnologia no ta adecua mas pa provee servicio excepcional y cumpli cu e rekisitonan comercial di N.V. ELMAR.

Ing. Robert Henriquez, Managing Director di N.V. Elmar a comenta: “Pa no solamente alcansa, pero surpasa nos standard nan di servicio, nos sa cu nos tabatin mester di tecnologia nobo cu ta diseña specificamente pa e demanda unico di e sector di electricidad na Aruba. Nos a identifica e necesidad pa reemplasa e sistema automatisa cu ta uzando actualmente pa un Customer Information System pa medio di un proceso di evaluacion”.

A reconoce e mehoracion di funcionalidad cu un solucion di CIS nobo lo provee mientras cu ainda ta capaz pa cumpli cu e rekisitonan pa cu integracion. CIS ta ofrece solucion y beneficio tanto pa e clientenan como pa e empleadonan. E lo permiti pa ofrece clientenan opcionnan adicional pa haci pago y ricibi notificacionnan y lo provee empleadonan cu acceso mas rapido y facil na informacion ora cu mester di dje, sea si ta na oficina of riba caya.

E Customer Information System (CIS) nobo ta bay “live” durante di e prome siman di september proximo y lo sirbi como e aplicacion principal pa areanan clave di e operacionnan di N.V. ELMAR pa futuro.

Algun di e beneficionan cu ta bin cu implementacion di e CIS nobo ta encera un sistema di IT cu ta moderno, stabiel y cu por depende riba dje pa reduci risico di fayo den traha factura y e fluho di placa efectivo; Brinda mas informacion detaya di e usuario y su uzo, cual ta provee oportunidad pa decisionnan di gerencia mas efectivo y cu miho enfoke; Mehora acceso di data pa e representante di servicio di N.V. ELMAR, esaki ta yuda pa bin cu solucionnan mas rapido pa asuntonan relaciona cu e clientenan; Historia di e cuenta awo ta “linked” na e cliente; Mehoracion den e cobransa di debe; Provee cliente cu e oportunidad pa mira su informacion di cuenta via di Internet.

“E tipo di avancenan asina den nos servicio no ta bini pa suerte ni tampoco pa casualidad. A forma un ekipo special di empleadonan for di diferente departamentonan di N.V. ELMAR, cu hunto a guia e proyecto aki. Nos ta masha orguyoso di nan y mi ta sigur cu e clientenan tambe lo ta feliz cu un nivel mas halto di servicio”, asina Ing. Robert Henriquez di N.V. ELMAR a termina bisando.