Interupcionnan di coriente ta for di mannan di N.V. ELMAR

ORANJESTAD, Aruba - 18 di april 2016: "Nos ta consciente di e inconveniencia cu interupcion di coriente ta causa, pesey mes nos ta lamenta masha e ultimo susedidonan", asina Wanda Broeksema, gerente di e departamento di "Servicio na Cliente" a expresa dialuna mainta despues cu atrobe parti di Oranjestad a keda sin coriente. E caso aki no ta isola, sino ta bini como un mas riba un siman di interupcionnan tras di otro y un biaha hasta 2 bes den e mesun dia.

"Pero mester ta cla pa nos clientenan cu N.V. ELMAR ta e compania di distribucion di coriente, pues nos ta depende pa ricibi coriente di WEB cu ta e compania di produccion. Di otro banda, nos sa confronta bastante reto cu accidentenan di auto y ultimamente compania di construccion cu ta corta nos kabelnan di coriente durante nan trabou", segun Wanda Broeksema a enfatisa.
 
Claro cu N.V. ELMAR ta haciendo tur locual ta den su alcance pa evita mas di e casonan aki, dor di supervisa e trabounan miho, no obstante cu nan mes no ta envolvi den e proyectonan. Esaki pa evita cu nan clientenan ta sali perhudica y den cierto forma ta perhudica entradanan di N.V. ELMAR tambe pasobra mas coriente bay, menos e consumo.

Siman pasa Dialuna dia 11 di april durante oranan di merdia a presenta un fayo ora cu un contratista a causa daño na kabelnan di N.V. ELMAR. Diamars 9:00pm kabel a cay na Sombre na Santa Cruz cu tambe a causa interupcion un rato, diahuebs mainta trempan te merdia varios area sin coriente pa motibo cu contratista riba Vierbaansweg a kap kabel di 60 mil volt. Atardi ora a conecta tur cos, ata coriente a bay un rato atrobe. 

Tur esaki mientras dialuna mainta ta habri cu alrededor di 10:00am atrobe coriente ta bay pa motibo di un fayo cu a presenta den e sistema di WEB. Despues di un rato a cuminsa suministra N.V. ELMAR cu suficiente capacidad pa por a reanuda suministro normal atrobe. 

"Nos ta consciente cu cada biaha cu coriente bay, ta interumpi bida normal, ta stroba hacimento di negoshi, tin perdemento di entrada y asina por sigui menciona. Awendia nos bida ta depende hopi di tecnologia y den esey coriente ta esencial", di acuerdo cu e ehecutivo di N.V. ELMAR. "Pesey nos disculpa na nos clientenan, aunke cu e interupcionnan ta for di nos mannan. Pero nos lo sigui haci tur lo posibel pa evita, esey nos ta priminti nos clientenan", asina Wanda Broeksema a termina bisando.

N.V. ELMAR a celebra 65 aña di existencia na november ultimo y ta conta cu un total di 165 empleado den servicio directo di e compania. Siendo nos compania nacional distribuido di coriente, N.V. ELMAR ta inverti alrededor di 20 miyon florin tur aña den mantencion y actualisacion di su red di electricidad.