N.V. ELMAR a lansa su "Customer Information System"

Mescos cu e clientenan ta contento con implementacion di e sistema nobo a bay, e empleadonan di N.V. Elmar tambe ta masha contento cu awor nan lo por brinda mas y miho servicio na clientenan. Den e proceso a parti chuculati y un cubus tambe pa entretene clientenan cu a bishita N.V. Elmar siman pasa.

A probecha e lansamento di e sistema nobo aki pa duna e sucursalnan di N.V. Elmar un apariencia interno nobo, algo cu clientenan a ripara mesora. E comentarionan tabata masha positivo y ta encurasha empleadonan pa sigui haci cambio den bienestar di e nivel di servicio cu ta brinda diariamente na clientenan corporativo y domestico, conecta na e red di coriente di N.V. Elmar.

Papiando di imagen nobo, separa di e logo nobo di N.V. Elmar, dentro di poco lo lansa e website nobo tambe, cu ta bin compaña pa un “Customer Portal”. Pa por haci uzo di e sistema nobo, eficiente y automatisa aki, mester manda un email pa customerservice@elmar.aw y ta manda informacion mesora pa e cliente.
Lansa un sistema nobo di cobransa no ta algo cu ta sosode tur aña. N.V. ELMAR ta masha contento y ta gradici su clientenan pa e extra pasenshi cu mester a brinda pa empleadonan custuma cu e sistema nobo di procesa pago.

E sistema nobo di servicio na cliente, “Customer Information System” (C.I.S) a drenta operacion oficial dialuna dia 7 di september  2015. E ta diseña pa brinda miho servicio na e clientenan y provee un base mas eficiente pa cu tecnologia di informacion pa su operacionnan comercial. Den su afan pa mehora servicio y eficiencia, N.V. ELMAR a implementa e software nobo y e hardware pa apoy’e, pa yuda yega na un nivel di servicio di calidad mas halto pa medio di un solo solucion pa maneha tur proceso cu ta envolve e cliente.

CIS ta ofrece solucion y beneficio tanto pa e clientenan como pa e empleadonan. E ta permiti pa ofrece clientenan opcionnan adicional pa haci pago y ricibi notificacionnan y provee empleadonan cu acceso mas rapido y facil na informacion ora cu mester di dje, sea ta na oficina of riba caya.

N.V. ELMAR ta celebra 65 aña di existencia na november proximo y ta conta cu un total di 165 empleado den servicio directo di e compania. Siendo nos compania nacional di distribucion di coriente, N.V. ELMAR ta inverti alrededor di 20 miyon florin tur aña den mantencion y actualisacion di su red di electricidad. Cu lansamento di CIS, ta keda demostra cu no ta dedica atencion solamente na aspectonan tecnico y di infrastructura, sino tambe na e nivel di servicio eficiente y moderno cu ta brinda clientenan diariamente.