N.V. ELMAR ta celebra 65 aña distribuyendo coriente

Cambionan grandi a tuma luga ora cu na 1958 Gobierno a cumpra un stacion di genera coriente cu un capacidad mas grandi, esta 15000kW pa e establecimento di WEB Aruba N.V. pa provee awa potabel. Hunto cu N.V. ELMAR a tuma e decision cu ELMAR lo cuminsa cumpra mayoria di e coriente for di WEB y lo distribui esaki na su clientenan.

Aña 1964 tabata un aña di mas cambio cu e establecimento di un sociedad (partnership) duradero y sostenibel, ora cu Gobierno di Aruba, N.V. ELMAR y WEB Aruba N.V. a cera un acuerdo pa WEB genera tur e coriente cu ELMAR lo distribui pa medio di e red di distribucion pa cual e ta completamente responsabel, tanto pa su mantencion como pa su expansion.

Na 1968, N.V. ELMAR a dicidi di desmantela nan oficina principal na Spaans Lagoen y muda pa Oranjestad. Pa aña 1980, e compania a crece di 51 transformer pa mas of menos 800 transformer y su red di distribucion a expande for di 64 kilometer pa mas di 400 kilometer.

Den e siguiente decada, N.V. ELMAR a haya su mes confronta cu diferente reto, cu a resulta den e eliminacion di e consorcio OGEM, na 1990. OGEM tabata pasando den un crisis financiero y, finalmente e accionnan den e compania a wordo bendi na Utilities Aruba N.V., cu ta un compania di gobierno.

Desde e punto den historia aki, N.V. ELMAR a bira y keda un compania financieramente stabiel cu ta sigui conoce innovacion continuo y expansion grandi. Inversionnan ta wordo haci den desaroyo di eficiencia pa cu distribucion y maneho, y desaroyonan grandi den tecnologia a exigi pa N.V. ELMAR adapta y sigui desaroya.

Na aña 2012 N.V. ELMAR a cuminsa cambia luznan di caya tradicional pa luznan LED, cual ta mas eficiente y duradero. E compania tambe ta desaroyando y adaptando su red di coriente den un red mas inteligente, conoci como un “smart grid” pa asina acomoda diferente desaroyo nobo. Un “smart grid” ta contribui na e transicion di e forma standard pa haci negoshi pa un mentalidad cu tin servicio como punto di salida y entre otro ta haci posibel pa introduci productonan nobo cu mas facilidad.

Na aña 2013 N.V. ELMAR a cuminsa ofrece meternan prepago den diferente districto y ta acomoda riba su red tambe fuentenan di energia sostenibel, manera panelnan solar cu ta wordo instala na cas y negoshinan.

Actualmente N.V. ELMAR, entre otro ta sondeando e opcionnan pa modifica e red di coriente pa acomoda stacionnan pa carga autonan electrico.

N.V. ELMAR ta den desaroyo continuo, manteniendo un balansa entre consistencia, servicio, finansa, inversion y innovacion pa provee e ciudadano y bishitante di Aruba, como tambe negoshinan di tur tipo cu tur diferente necesidadnan, cu e miho servicio 24/7.
 
N.V. ELMAR ta conta cu 165 empleado den servicio directo di e compania. Cu orguyo por bisa di a logra cumpli cu e tarea den e ultimo 65 aña debidamente den e comunidad Arubano y gran parti danki na empleadonan motiva dedicando nan mes cu masha entusiasmo na nan trabou. Palabranan di gradicimento na nan tur y tambe na tur e pensionadonan. Nos gradicimento tambe na pueblo di Aruba pa e confianza y sosten pa cu N.V. ELMAR.