Sistema administrativo di N.V. ELMAR ta moderno y eficiente

ORANJESTAD, Aruba - 14 di April 2016: “Mi kier sigura comunidad cu nos punto di salida nunca ta pa corta coriente di ningun hende, ni di clientenan domestico pero tampoco di clientenan comercial. Esaki ta e ultimo recurso ora e debe acumula di tal forma cu e ta bira iresponsabel pa lag’e sigui subi”, asina Wanda Broeksema, gerente di e departamento di Servicio na Cliente na N.V. ELMAR a reacciona riba declaracionnan di un restaurant local riba rednan social y den prensa.

Na prome luga nos ta lamenta masha e inconveniencia cu e negoshi a haya su mes aden. Tambe pa e hecho cu nan ta sinti cu nos empleadonan no a trata nan na e forma cu lo a desea. Na N.V. ELMAR ta trata diariamente pa por surpasa expectativa di clientenan, tanto na e nivel di distribucion como tambe pa e servicio cu ta brinda. Lo sigui haci tur esfuerso pa mehora e nivel di servicio mas ainda.

Lamentablemente como compania N.V. ELMAR no por discuti cuenta di cliente den medionan di comunicacion, pero di otro banda e compania tin cu salvaguardia su reputacion corporativo y su sistema administrativo. No mas cu algun luna pasa nos compania nacional di distribucion di coriente a lansa un sistema nobo, moderno y eficiente di cobransa, CIS, den cual awor tur luna e cliente tin un miho bista riba su consumo, riba su pagonan y riba locual ta habri pa paga ainda. Ta lamenta masha cu no a comprende e sistema y a cataloga e sistema aki di ta “na werki”. 

Mester ta cla pa tur hende cu na N.V. ELMAR no ta desconecta suministro di coriente facil, pasobra mas coriente nos clientenan uza, mas entrada e ta pa e compania. N.V. ELMAR hopi biaha ta logra yega na areglonan di pago, loke ta haci regularmente cu clientenan cu haya nan mes confronta cu retonan financiero pa paga nan cuentanan atrasa di coriente. Pero, di otro banda N.V. ELMAR tin responsabilidad financiero pa cumpli cune tambe, cu ta rekeri cu cobransanan mester sali y cu mester cobra tambe. Ora cuentanan keda lunanan habri sin paga, e ta hinca e compania den un posicion fastioso pa cual mester tuma medida pa evita cu e debe ta sigui acumula sin cu ta logra cobra pa e consumo.

Pa loke ta e caso di interupcion di coriente riba dialuna, di cual e restaurant ta bisa cu nan a keda 4 ora sin coriente, mester informa cu den ambos caso e fayo tabata for di alcance di N.V. ELMAR y cu ambos biaha el a bay pa 20 minuut y no pa 2 ora manera ta sugeri!

N.V. ELMAR a celebra 65 aña di existencia na november ultimo y ta conta cu un total di 165 empleado den servicio directo di e compania. Siendo nos compania nacional distribuido di coriente, N.V. ELMAR ta inverti alrededor di 20 miyon florin tur aña den mantencion y actualisacion di su red di electricidad. Cu lansamento di CIS, ta demostra cu no ta dedica atencion solamente na aspectonan tecnico y di infrastructura, sino tambe na e nivel di servicio eficiente y moderno cu ta brinda clientenan diariamente.