N.V. ELMAR ta gradici clientenan pa e comprension demostra

E siman aki a tene tres dia exclusivamente pa atende cu clientenan cu mester a haci pago di nan cuenta mensual di uzo di coriente. Riba diaranson,diahuebs y diabierna no a procesa ningun otro transaccion mas, pa asina duna e caheronan e oportunidad pa por custuma cu e sistema nobo.

E sistema nobo di servicio na cliente, “Customer Information System” (C.I.S) ta diseña pa brinda miho servicio na e clientenan y provee un base mas eficiente pa cu tecnologia di informacion pa su operacionnan comercial. Den su afan pa mehora servicio y eficiencia, N.V. ELMAR a implementa e software nobo y e hardware pa apoy’e, pa yuda yega na un nivel di servicio di calidad mas halto pa medio di un solo solucion pa maneha tur proceso cu ta envolve e cliente.

CIS ta ofrece solucion y beneficio tanto pa e clientenan como pa e empleadonan. E ta permiti pa ofrece clientenan opcionnan adicional pa haci pago y ricibi notificacionnan y provee empleadonan cu acceso mas rapido y facil na informacion ora cu mester di dje, sea ta na oficina of riba caya.

Como compania, N.V. Elmar ta cambiando for di tradicional pa un compania mas sostenibel den tur area. Cu esey den mente, awor e compania ta refrescando su imagen, cu un blachi berde cu ta indica e transicion, cu e letter E visibel memey. E letter "E" ta para pa Elmar of pa electricidad. E slogan "Redefining Energy" ta sostene e idea di cambio, no solamente interno sino tambe externo. E colornan ta sostene e idea di move den direccion di energia berde.

Separa di imagen corporativo nobo, e oficinanan di N.V. Elmar tambe tin un “look” nobo y den transcurso di siman y e luna nos dilanti lo por mira mas di e cambionan pa refresca e imagen tambe di e diferente sucursalnan.

E sistema nobo ta drenta operacion oficial dialuna dia 7 di september  2015. E fecha ta cay net den e siman cu ta ultimo dia pa paga cuenta di awa na WEB. Ta anticipa cu e oficinanan di N.V. ELMAR lo por ta mas yen cu normal durante e siman aki, pa cual ta corda clientenan cu e sistema nobo ta tuma un poco mas tempo cu normal ora di procesa pago. Ta conta cu e pasenshi y comprension di clientenan den e proceso pa integra e sistema nobo di informacion di cliente, den un esfuerso pa por ta mas eficiente y brinda miho servicio.

Gerencia di N.V. Elmar tin palabranan di gradicimento na henter e “project team” y na tur empleado di N.V. Elmar cu di un manera of otro a contribui na realisacion di e proyecto aki.

Henter e proyecto aki ta forma parti di e vision di N.V. Elmar y e plan strategico di e compania di distribucion di coriente. “N.V. Elmar ta un organisacion lider den distribucion di electricidad confiabel y na un prijs husto. Nos ta haci esaki door di brinda servicio excelente y creando balor sostenibel pa nos clientenan, empleadonan, comunidad y otro stakeholdernan”, di acuerdo cu Wanda Broeksema, gerente di e departamento di Servicio na Cliente.

N.V. ELMAR ta celebra 65 aña di existencia na november proximo y ta conta cu un total di 165 empleado den servicio directo di e compania. Siendo nos compania nacional di distribucion di coriente, N.V. ELMAR ta inverti alrededor di 20 miyon florin tur aña den mantencion y actualisacion di su red di electricidad. Cu lansamento di CIS, ta keda demostra cu no ta dedica atencion solamente na aspectonan tecnico y di infrastructura, sino tambe na e nivel di servicio eficiente y moderno cu ta brinda clientenan diariamente.